Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. non tot Achaemeniis armantur etrusca sagittis
  2. spicula quot nostro pectore fixit Amor.
  3. hic me tam gracilis vetuit contemnere Musas,
  4. iussit et Ascraeum sic habitare nemus,
  5. non ut Pieriae quercus mea verba sequantur,
  6. aut possim Ismaria ducere valle feras,
  7. sed magis ut nostro stupefiat Cynthia versu:
  8. tunc ego sim Inachio notior arte Lino.
  9. non ego sum formae tantum mirator honestae,
  10. nec si qua illustris femina iactat avos:
  11. me iuvet in gremio doctae legisse puellae,
  12. auribus et puris scripta probasse mea.
  13. haec ubi contigerint, populi confusa valeto
  14. fabula: nam domina iudice tutus ero.
  15. quae si forte bonas ad pacem verterit auris,
  16. possum inimicitias tunc ego ferre Iovis.