Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. quod si deficiant vires, audacia certe
  2. laus erit: in magnis et voluisse sat est.
  3. aetas prima canat Veneres, extrema tumultus:
  4. bella canam, quando scripta puella mea est.
  5. nunc volo subducto gravior procedere vultu,
  6. nunc aliam citharam me mea Musa docet.
  7. surge, anima, ex humili; iam, carmine, sumite vires;
  8. Pierides, magni nunc erit oris opus.
  9. iam negat Euphrates equitem post terga tueri
  10. Parthorum et Crassos se tenuisse dolet:
  11. India quin, Auguste, tuo dat colla triumpho,
  12. et domus intactae te tremit Arabiae;
  13. et si qua extremis tellus se subtrahit oris,
  14. sentiat illa tuas postmodo capta manus!
  15. haec ego castra sequar; vates tua castra canendo
  16. magnus ero: servent hunc mihi fata diem!
  17. at caput in magnis ubi non est tangere signis,
  18. ponitur hac imos ante corona pedes;
  19. sic nos nunc, inopes laudis conscendere carmen,
  20. pauperibus sacris vilia tura damus.