Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- sed tempus lustrare aliis Helicona choreis,
- et campum Haemonio iam dare tempus equo.
- iam libet et fortis memorare ad proelia turmas
- et Romana mei dicere castra ducis.
- quod si deficiant vires, audacia certe
- laus erit: in magnis et voluisse sat est.
- aetas prima canat Veneres, extrema tumultus:
- bella canam, quando scripta puella mea est.
- nunc volo subducto gravior procedere vultu,
- nunc aliam citharam me mea Musa docet.
- surge, anima, ex humili; iam, carmine, sumite vires;
- Pierides, magni nunc erit oris opus.
- iam negat Euphrates equitem post terga tueri
- Parthorum et Crassos se tenuisse dolet:
- India quin, Auguste, tuo dat colla triumpho,
- et domus intactae te tremit Arabiae;
- et si qua extremis tellus se subtrahit oris,
- sentiat illa tuas postmodo capta manus!
- haec ego castra sequar; vates tua castra canendo
- magnus ero: servent hunc mihi fata diem!