Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. hanc ego non auro, non Indis flectere conchis,
  2. sed potui blandi carminis obsequio.
  3. sunt igitur Musae, neque amanti tardus Apollo,
  4. quis ego fretus amo: Cynthia rara meast!
  5. nunc mihi summa licet contingere sidera plantis:
  6. sive dies seu nox venerit, illa meast!
  7. nec mihi rivalis certos subducet amores:
  8. ista meam norit gloria canitiem.
  1. Dicebam tibi venturos, irrisor, amores,
  2. nec tibi perpetuo libera verba fore:
  3. ecce iaces supplexque venis ad iura puellae,
  4. et tibi nunc quaevis imperat empta modo.
  5. non me Chaoniae vincant in amore columbae
  6. dicere, quos iuvenes quaeque puella domet.