Elegiae
Propertius, Sextus
Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.
- si Perusina tibi patriae sunt nota sepulcra,
- Italiae duris funera temporibus,
- cum Romana suos egit discordia cives—
- sic mihi praecipue, pulvis Etrusca, dolor,
- tu proiecta mei perpessa's membra propinqui,
- tu nullo miseri contegis ossa solo—
- proxima suppositos contingens Umbria campos
- me genuit terris fertilis uberibus.
- Quaeritis, unde mihi totiens scribantur amores,
- unde meus veniat mollis in ore liber.
- non haec Calliope, non haec mihi cantat Apollo.
- ingenium nobis ipsa puella facit.