Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. non sic Haemonio Salmonida mixtus Enipeo
  2. Taenarius facili pressit amore deus,
  3. nec sic caelestem flagrans amor Herculis Heben
  4. sensit ab Oetaeis gaudia prima rogis.
  5. una dies omnis potuit praecurrere amantes:
  6. nam tibi non tepidas subdidit illa faces,
  7. nec tibi praeteritos passast succedere fastus,
  8. nec sinet: addictum te tuus ardor aget.
  9. nec mirum, cum sit Iove dignae proxima Ledae
  10. et Ledae partu gratior, una tribus;
  11. illa sit Inachiis et blandior heroinis,
  12. illa suis verbis cogat amare Iovem.
  13. tu vero quoniam semel es periturus amore,
  14. utere: non alio limine dignus eras.
  15. qui tibi sit felix, quoniam novus incidit, error;
  16. et quotcumque voles, una sit ista tibi.