Carmina

Catullus

Catullus, Gaius Valerius. Carmina. Merrill, Elmer Truesdell, editor. Boston: Ginn, 1893.

  1. Pulchre convenit improbis cinaedis,
  2. Mamurrae pathicoque Caesarique.
  3. nec mirum: maculae pares utrisque,
  4. urbana altera et illa Formiana,
  5. impressae resident nec eluentur:
  6. morbosi pariter gemelli utrique,
  7. uno in lecticulo erudituli ambo,
  8. non hic quam ille magis vorax adulter,
  9. rivales socii puellularum:
  10. pulchre convenit improbis cinaedis.