Carmina

Catullus

Catullus, Gaius Valerius. Carmina. Merrill, Elmer Truesdell, editor. Boston: Ginn, 1893.

  1. Amabo, mea dulcis Ipsithilla,
  2. meae deliciae, mei lepores,
  3. iube ad te veniam meridiatum.
  4. et si iusseris illud, adiuvato,
  5. ne quis liminis obseret tabellam,
  6. neu tibi libeat foras abire;
  7. sed domi maneas paresque nobis
  8. novem continuas fututiones.
  9. verum, si quid ages, statim iubeto:
  10. nam pransus iaceo et satur supinus
  11. pertundo tunicamque palliumque.