Carmina
Catullus
Catullus, Gaius Valerius. Carmina. Merrill, Elmer Truesdell, editor. Boston: Ginn, 1893.
- Cui dono lepidum novum libellum
- arido modo pumice expolitum?
- Corneli, tibi; namque tu solebas
- meas esse aliquid putare nugas,
- iam tum cum ausus es unus Italorum
- omne aevum tribus explicare chartis,
- doctis, Iuppiter, et laboriosis!
- quare habe tibi quidquid hoc libelli
- qualecumque, quod, o patrona virgo,
- plus uno maneat perenne saeclo.