Odyssey
Homer
Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.
- ἦε φιλόξεινοι καί σφιν νόος ἐστὶ θεουδής;
- ὥς τέ με κουράων ἀμφήλυθε θῆλυς ἀυτή·
- νυμφάων, αἳ ἔχουσʼ ὀρέων αἰπεινὰ κάρηνα
- καὶ πηγὰς ποταμῶν καὶ πίσεα ποιήεντα.
- ἦ νύ που ἀνθρώπων εἰμὶ σχεδὸν αὐδηέντων;
- ἀλλʼ ἄγʼ ἐγὼν αὐτὸς πειρήσομαι ἠδὲ ἴδωμαι.
- ὣς εἰπὼν θάμνων ὑπεδύσετο δῖος Ὀδυσσεύς,
- ἐκ πυκινῆς δʼ ὕλης πτόρθον κλάσε χειρὶ παχείῃ
- φύλλων, ὡς ῥύσαιτο περὶ χροῒ μήδεα φωτός.
- βῆ δʼ ἴμεν ὥς τε λέων ὀρεσίτροφος ἀλκὶ πεποιθώς,
- ὅς τʼ εἶσʼ ὑόμενος καὶ ἀήμενος, ἐν δέ οἱ ὄσσε
- δαίεται· αὐτὰρ ὁ βουσὶ μετέρχεται ἢ ὀίεσσιν
- ἠὲ μετʼ ἀγροτέρας ἐλάφους· κέλεται δέ ἑ γαστὴρ
- μήλων πειρήσοντα καὶ ἐς πυκινὸν δόμον ἐλθεῖν·
- ὣς Ὀδυσεὺς κούρῃσιν ἐυπλοκάμοισιν ἔμελλε
- μίξεσθαι, γυμνός περ ἐών· χρειὼ γὰρ ἵκανε.
- σμερδαλέος δʼ αὐτῇσι φάνη κεκακωμένος ἅλμῃ,
- τρέσσαν δʼ ἄλλυδις ἄλλη ἐπʼ ἠιόνας προὐχούσας·
- οἴη δʼ Ἀλκινόου θυγάτηρ μένε· τῇ γὰρ Ἀθήνη
- θάρσος ἐνὶ φρεσὶ θῆκε καὶ ἐκ δέος εἵλετο γυίων.