Odyssey
Homer
Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.
- ὕβριν ἀλυσκάζων ἀνδρῶν ὑπερηνορεόντων.
- ἀλλά σε μεῖναι ἄνωγεν ἐς ἠέλιον καταδύντα.
- καὶ δὲ σοὶ ὧδʼ αὐτῇ πολὺ κάλλιον, ὦ βασίλεια,
- οἴην πρὸς ξεῖνον φάσθαι ἔπος ἠδʼ ἐπακοῦσαι.
- τὸν δʼ αὖτε προσέειπε περίφρων Πηνελόπεια·
- οὐκ ἄφρων ὁ ξεῖνος· ὀΐεται, ὥς περ ἂν εἴη·
- οὐ γάρ πού τινες ὧδε καταθνητῶν ἀνθρώπων
- ἀνέρες ὑβρίζοντες ἀτάσθαλα μηχανόωνται.
- ἡ μὲν ἄρʼ ὣς ἀγόρευεν, ὁ δʼ ᾤχετο δῖος ὑφορβὸς
- μνηστήρων ἐς ὅμιλον, ἐπεὶ διεπέφραδε πάντα.
- αἶψα δὲ Τηλέμαχον ἔπεα πτερόεντα προσηύδα,
- ἄγχι σχὼν κεφαλήν, ἵνα μὴ πευθοίαθʼ οἱ ἄλλοι·
- ὦ φίλʼ, ἐγὼ μὲν ἄπειμι, σύας καὶ κεῖνα φυλάξων,
- σὸν καὶ ἐμὸν βίοτον· σοὶ δʼ ἐνθάδε πάντα μελόντων.
- αὐτὸν μέν σε πρῶτα σάω, καὶ φράζεο θυμῷ
- μή τι πάθῃς· πολλοὶ δὲ κακὰ φρονέουσιν Ἀχαιῶν,
- τοὺς Ζεὺς ἐξολέσειε πρὶν ἡμῖν πῆμα γενέσθαι.
- τὸν δʼ αὖ Τηλέμαχος πεπνυμένος ἀντίον ηὔδα·
- ἔσσεται οὕτως, ἄττα· σὺ δʼ ἔρχεο δειελιήσας·
- ἠῶθεν δʼ ἰέναι καὶ ἄγειν ἱερήϊα καλά·