Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- μηδὲ ἔα νῆας ἅλα δʼ ἑλκέμεν ἀμφιελίσσας.
- ὣς φάθʼ, ὃ δὲ ξυνέηκε θεᾶς ὄπα φωνησάσης,
- βῆ δὲ θέειν, ἀπὸ δὲ χλαῖναν βάλε· τὴν δὲ κόμισσε
- κῆρυξ Εὐρυβάτης Ἰθακήσιος ὅς οἱ ὀπήδει·
- αὐτὸς δʼ Ἀτρεΐδεω Ἀγαμέμνονος ἀντίος ἐλθὼν
- δέξατό οἱ σκῆπτρον πατρώϊον ἄφθιτον αἰεί·
- σὺν τῷ ἔβη κατὰ νῆας Ἀχαιῶν χαλκοχιτώνων.
- ὅν τινα μὲν βασιλῆα καὶ ἔξοχον ἄνδρα κιχείη
- τὸν δʼ ἀγανοῖς ἐπέεσσιν ἐρητύσασκε παραστάς·
- δαιμόνιʼ οὔ σε ἔοικε κακὸν ὣς δειδίσσεσθαι,
- ἀλλʼ αὐτός τε κάθησο καὶ ἄλλους ἵδρυε λαούς·
- οὐ γάρ πω σάφα οἶσθʼ οἷος νόος Ἀτρεΐωνος·
- νῦν μὲν πειρᾶται, τάχα δʼ ἴψεται υἷας Ἀχαιῶν.
- ἐν βουλῇ δʼ οὐ πάντες ἀκούσαμεν οἷον ἔειπε.
- μή τι χολωσάμενος ῥέξῃ κακὸν υἷας Ἀχαιῶν·
- θυμὸς δὲ μέγας ἐστὶ διοτρεφέων βασιλήων,
- τιμὴ δʼ ἐκ Διός ἐστι, φιλεῖ δέ ἑ μητίετα Ζεύς.
- ὃν δʼ αὖ δήμου τʼ ἄνδρα ἴδοι βοόωντά τʼ ἐφεύροι,
- τὸν σκήπτρῳ ἐλάσασκεν ὁμοκλήσασκέ τε μύθῳ·
- δαιμόνιʼ ἀτρέμας ἧσο καὶ ἄλλων μῦθον ἄκουε,