Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- ἰθύει, ἀλλʼ οὔ τι πρήσσει· θαμέες γὰρ ἄκοντες
- ἀντίον ἀΐσσουσι θρασειάων ἀπὸ χειρῶν,
- καιόμεναί τε δεταί, τάς τε τρεῖ ἐσσύμενός περ·
- ἠῶθεν δʼ ἀπονόσφιν ἔβη τετιηότι θυμῷ·
- ὣς ἀπὸ Πατρόκλοιο βοὴν ἀγαθὸς Μενέλαος
- ἤϊε πόλλʼ ἀέκων· περὶ γὰρ δίε μή μιν Ἀχαιοὶ
- ἀργαλέου πρὸ φόβοιο ἕλωρ δηΐοισι λίποιεν.
- πολλὰ δὲ Μηριόνῃ τε καὶ Αἰάντεσσʼ ἐπέτελλεν·
- Αἴαντʼ Ἀργείων ἡγήτορε Μηριόνη τε
- νῦν τις ἐνηείης Πατροκλῆος δειλοῖο
- μνησάσθω· πᾶσιν γὰρ ἐπίστατο μείλιχος εἶναι
- ζωὸς ἐών· νῦν αὖ θάνατος καὶ μοῖρα κιχάνει.
- ὣς ἄρα φωνήσας ἀπέβη ξανθὸς Μενέλαος,
- πάντοσε παπταίνων ὥς τʼ αἰετός, ὅν ῥά τέ φασιν
- ὀξύτατον δέρκεσθαι ὑπουρανίων πετεηνῶν,
- ὅν τε καὶ ὑψόθʼ ἐόντα πόδας ταχὺς οὐκ ἔλαθε πτὼξ
- θάμνῳ ὑπʼ ἀμφικόμῳ κατακείμενος, ἀλλά τʼ ἐπʼ αὐτῷ
- ἔσσυτο, καί τέ μιν ὦκα λαβὼν ἐξείλετο θυμόν.
- ὣς τότε σοὶ Μενέλαε διοτρεφὲς ὄσσε φαεινὼ
- πάντοσε δινείσθην πολέων κατὰ ἔθνος ἑταίρων,