Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- δερκομένῳ, ἐπεὶ οὔ οἱ ἔνι φρένες οὐδʼ ἠβαιαί.
- ἀλλʼ ὃ μὲν ὣς ἀπόλοιτο, θεὸς δέ ἑ σιφλώσειε·
- σοὶ δʼ οὔ πω μάλα πάγχυ θεοὶ μάκαρες κοτέουσιν,
- ἀλλʼ ἔτι που Τρώων ἡγήτορες ἠδὲ μέδοντες
- εὐρὺ κονίσουσιν πεδίον, σὺ δʼ ἐπόψεαι αὐτὸς
- φεύγοντας προτὶ ἄστυ νεῶν ἄπο καὶ κλισιάων.
- ὣς εἰπὼν μέγʼ ἄϋσεν ἐπεσσύμενος πεδίοιο.
- ὅσσόν τʼ ἐννεάχιλοι ἐπίαχον ἢ δεκάχιλοι
- ἀνέρες ἐν πολέμῳ ἔριδα ξυνάγοντες Ἄρηος,
- τόσσην ἐκ στήθεσφιν ὄπα κρείων ἐνοσίχθων
- ἧκεν· Ἀχαιοῖσιν δὲ μέγα σθένος ἔμβαλʼ ἑκάστῳ
- καρδίῃ, ἄληκτον πολεμίζειν ἠδὲ μάχεσθαι.
- Ἥρη δʼ εἰσεῖδε χρυσόθρονος ὀφθαλμοῖσι
- στᾶσʼ ἐξ Οὐλύμποιο ἀπὸ ῥίου· αὐτίκα δʼ ἔγνω
- τὸν μὲν ποιπνύοντα μάχην ἀνὰ κυδιάνειραν
- αὐτοκασίγνητον καὶ δαέρα, χαῖρε δὲ θυμῷ·
- Ζῆνα δʼ ἐπʼ ἀκροτάτης κορυφῆς πολυπίδακος Ἴδης
- ἥμενον εἰσεῖδε, στυγερὸς δέ οἱ ἔπλετο θυμῷ.
- μερμήριξε δʼ ἔπειτα βοῶπις πότνια Ἥρη
- ὅππως ἐξαπάφοιτο Διὸς νόον αἰγιόχοιο·