dum haec, si modo hoc anno acta sunt, Romae aguntur, consules ambo in Liguribus gerebant bellum.
is hostis velut natus ad continendam inter magnorum intervalla
bellorum Romanis militarem disciplinam erat;
et amoenitate urbium et copia terrestrium maritimarumque rerum et mollitia hostium regiisque opibus ditiores quam fortiores exercitus faciebat.
praecipue sub imperio Cn. Manlii solute ac neglegenter habiti sunt. itaque asperius paulo iter in Thracia et exercitatior hostis magna clade eos castigavit.
in Liguribus omnia erant, quae militem excitarent, loca montana et aspera, quae et ipsis capere labor erat et ex praeoccupatis deicere hostem;
itinera ardua, angusta, infesta insidiis; hostis levis et velox
et repentinus, qui nullum usquam tempus, nullum locum quietum
aut securum esse sineret; oppugnatio necessaria munitorum
castellorum, laboriosa simul periculosaque; inops regio, quae
parsimonia astringeret milites, praedae haud
itaque non lixa sequebatur, non iumentorum longus ordo agmen extendebat. nihil praeter arma et viros omnem spem in armis habentes erat.
nec deerat umquam cum iis vel materia belli vel causa, quia propter domesticam inopiam vicinos agros incursabant. nec tamen in discrimen summae rerum pugnabatur.